بسم الله الرحمن الرحيم

أخى ... أختى المقبل أو المقبلة على مقابلة فى السفارة الأمريكية أو أى سفارة
سنتكلم هنا عن موضوع مهم لم يتطرق إليه أحد بالتفصيل، ألا وهو

........
الثقة بالنفس

كثيراً من الأخوة يقول لك يجب أن تثق بنفسك
وهذا كلام جميل
ولكن ما هى علامات الثقة بالنفس؟؟؟!!!
كيف أظهر ثقتى بنفسى؟!!!

يجب أن تعرف تماماً أن القنصل أو موظف السفارة قام يمقابلات كثيرة مع من هم مثلك
كما يجب أن تعرف وهذا الأهم أن هذا القنصل دارس لعلم النفس
ويستطيع أن يعرف الكثير عنك من علامات قد تظهر عليك أثناء المقابلة

لا تمل وأكمل الموضوع للآخر
اللى جاى فيه المفيد

طيب يا عم إنت بتقول إنه ممكن يعرف الكثير عنى من علامات قد تظهر علي أثناء المقابلة
زى إيه من العلامات دى؟!!!

كلنا قبل المقابلة بنكون خايفين وقلقانين
وهذا صحى وكويس
ولكن الغير صحى أن يظهر هذا القلق على وجهنا وانفعالاتنا





بداية كل المطلوب منك
1- أن تركز فى المعلومات بتاعتك
يعنى لو إنت مثلاُ مقدم على فيزا K1 أو cr1 فيجب أن تعرف المعلومات المهمة عن خطيبتك (خطيبك) أو زوجتك (زوجك)
2- ملابس شيك (الملابس تؤثر كثيراً فى ثقتك فى نفسك)
الملابس لا يجب أن يكون مبالغ فيها، فلا تلبس تى شيرت عليه علم أمريكا مثلاُ

3- الثقة فى النفس .... كلنا بنقول الثقة فى النفس مهمة ولكن كيف أظهر ثقتى فى نفسى؟؟!!!
فاكر لما قلت لك إن القنصل دارس لعلم النفس
آه فاكر ....
الحمد لله إنك فاكر ... لأن هذه الجزئية هى الأهم
المطلوب منك أن تتدرب بينك وبين نفسك قبل المقابلة على الآتى:
إن تطلب الأمر أن تنظر إلى المرآة فلا تتردد
1- يجب أن تنظر إلى عيني القنصل أغلب الوقت وأن ترسم ابتسامة خفيفة على وجهك، وحاذر من ظهور القلق على وجهك
2- المفروض إنك مركز كويس فى الأسئلة والمعلومات فلا تنظر إلى الأسفل أو إلى الأعلى كأنك تبحث أن شئ فى الماضي أو كأنك تألف الإجابة (كل حركة للعين لها معنى فى علم النفس)
3- الإجابة تكون مختصرة، فلا تعطى معلومات زيادة من عندك
4- حاول ألا تأتى بحركات تدل على انفعالاتك وقلقك وهذا يأتى بالتدريب
(يستحسن ألا تتحرك كثيراً فكل حركة من حركات الجسم لها معنى فى علم النفس أيضاً)
كل ده وأنت محافظ على هدوئك وإبتسامة خفيفة وأنظر إلى عيني القنصل أغلب الوقت
5- التحدث بطريقة لا تدل على القلق ولا الخوف من القنصل، وبطريقة محترمة فى نفس الوقت

ملاحظات هامة:
- هناك فترة كبيرة تنتظرها داخل السفارة قبل إجراء المقابلة، فيجب أن تحافظ على هدوئك، ويستحسن لو أحضرت معك عصير أو أى أكل خفيف لأن المدة كبيرة، وهناك كافيتريا ممكن تشترى منها ولكن أسعارهم الضعفين

- أى ورقة أرسلتها إلى السفارة أو عندهم منها نسخة يجب أن تعرف محتوياتها وماذا تحوى من معلومات، وخاصة الأوراق التى تخص خطيبتك أو زوجتك، فى الغالب ستسأل عن بيانات ومعلومات وردت فيها

- بداية المقابلة:
فى بداية المقابلة تبدأ بتحية القنصل
Hi or Hello
مع ابتسامة خفيفة

- نهاية المقابلة:
أياً كان إحساسك بإقتناعه أو عدم إقتناعه بكلامك
فلا تتردد أن تنهى المقابلة بإبتسامة
thank you




وأخيراً لكم منى جميعاً كل التمنيات والدعوات بالتوفيق
والله أسأل أن يجعل هذا الموضوع لى وليس على
وأن يهبنى القبول من عنده

وأرجو منكم الدعاء لى بالتوفيق
ومن استفاد من الموضوع عملياً ووفقه الله فى مقابلته أن يفرحنا هنا جميعا

لكم منى كل الود والاحترام



.................

استكمالا لموضوع love_usa

بسم الله الرحمن الرحيم

تابع ملاحظات هامة: (بالتفصيل للى مارحش قبل كده السفارة)
- معلومة بعيدة عن السفارة (مترو الأنفاق بيبدأ الساعة 5:30 ص)
- الحضور إلى السفارة مبكراً فى الميعاد (الساعة 7:30 ص) ومعك جواب السفارة الذى تم ارساله إليك وبه الموعد
- سيقول لكم موظف السفارة إعملوا طابورين (طابور للزيارة والسياحة، وطابور آخر للهجرة) بجوار الكشك الخشب الذى به العسكرى
- بيسألك الموظف كام واحد مقدم على التأشيرة، ويأخذ منك الجواب ويكتب العدد، ثم يعطيك الجواب مرة ثانية.
- فى واحد تاني بيتأكد من اللى مكتوب على الجواب، وبيقول لك لو معاك موبايل أقفله وهتسلمه لموظف أو موظفة عندما تدخل.
- بعد كده بتدخل من البوابة الحديدية الخارجية وبتحط حاجاتك اللى معاك على الكاونتر، علشان الموظف أو الموظفة يفتشها، وبتديله الموبايل وبيديلك رقم علشان وإنت خارج تاخد موبايلك
- وبعدين بتعدى من باب الأمن الذى يكشف أى حاجة معدنية معك، وبتاخد حاجاتك وأوراقك وبتدخل على طرقة وتطلع درجتين، ثم تنزل سلم دائرى، فى آخر السلم تحت فى واحد منتظرك بيديلك رقم، وهو ده رقمك اللى هتتعامل به بالداخل
- بعد ما بتدخل فى كراسى أمامك، حاول تختار كرسى فى الصف الأول علشان تبقى حر الحركة عند النده على رقمك، لو مفيش كرسى فى الأول مفيش مشكلة، الشبابيك بتاعت المقابلة قدام على اليمين، فى ثلاثة ظاهرين والباقى فى طرقة بجوارهم، تقريباً فى لحد 11 شباك.
على شمالك حوالى ثلاثة كمبيوترات للى عايز يعمل نموذج التقديم للسياحة والزيارة، والأجهزة بتبقى مفتوحة ومتظبطة على الموقع المطلوب، وفى طابعة علشان تطبع بعد ما تخلص تسجيل بجوار الطابعة طرقة صغيرة توديك على الحمام، أمامك شاشة تلفزيونية بتعرض أخبار وكلام عن السفر لأمريكا والاستثمار والدراسة فيها.
بجوار الشاشة هتلاقى شاب أو شابة بيساعدك فى ترتيب أوراقك. وهو بينده على الأرقام اللى معاكم علشان العملية تتم بنظام، لو إنت متأكد من أوراقك من الممكن أن لا تذهب إليه وتطنشه، ولكنى لا أنصحك بالكلام ده، علشان لو فى حاجة ناقصة فى أوراقك، هو هيساعدك، أو لو فى غلط فى النموذج اللى بيتعمل على النت تلحق تعمله على جهاز من الأجهزة الثلاثة اللى على الشمال، ولا تتردد أن تسأله أى سؤال فى الأوراق، ولكن لا تطلب منه أن يكتب بدلاً منك، لأنه لا يستطيع ذلك، فهو هناك ليساعدك فقط.
بالنسبة لفيزا الـ k1 أو ال cr1 لن يساعدك هذا الشاب فى ترتيب أوراقك، لأنك بالفعل أرسلت أوراقك من قبل عن طريق الـ DHL وصور من الأوراق.
- بالنسبة لفيزا الـ k1 أو ال cr1 المفروض أنك تحضر معك أصول الأوراق التى قد أرسلت صورها من قبل وتحضرها معك فى المقابلة، وكذلك الصور الفوتوغرافية التى بينك وبين خطيبتك أو زوجتك، وأهلك طبعاً معاكم فى بعض الصور، وطبعاً صور فى مدينتك وفى أى مكان اتفسحتم فيه، ولو أمكن صور أصدقائك معكم
- الفترة التى سوف تنتظرها فى السفارة طويلة، فحافظ على هدوئك، وركز فى ثقتك فى نفسك
- سوف تسمع الأرقام ينده عليها فى الميكروفون، ركز فى رقمك والشباك اللى بيقولوا عليه فى الميكروفون علشان تروح على رقم الشباك صح
- بالنسبة لفيزا الـ k1 أو ال cr1 سوف ينده عليك ثلاث مرات
أول مرة ستسلم الصور وسوف تدفع فى الـ DHL
ثانى مرة لأخذ البصمات
ثالث مرة وسوف ينده على اسمك هذه المرة (وهذه هى المقابلة فاستعد) ودى بتتأخر فلا تقلق، من 1:30م تقريباً وحتى 2:30م

- استكمالاً لمايجب أن تفعله فى المقابلة
- أوعى تستخدم الكلمات التى فيها احتمالات
- خلى كلامك مؤكد ولا شك فيه
يعنى إيه الكلام ده؟!!!
أقولك يعنى إيه
يعنى لا تستخدم مثلاً كلمة
I think
Maybe
If that happen then i'll do this or that
خلى كلامك مقنع، وتكون واثق من كل كلامك

لو إنت دارس لطرق التسويق والمبيعات هتفهم كلامى، ولو إنت مش دارس برضه هتفهم كلامى

وأنا حاضر وحوجود لأى سؤال إن شاء الله، وإن شاء الله أجاوب على قدر المستطاع

إن شاء المشاركة القادمة سيكون فيها بعض الأسئلة المتعارف عليها التى من الممكن أن يسألها لك القنصل فى حالة الـ k1 أو cr1

وفقنا الله جميعاً